ທີ່ຜ່ານມາ ຫຼາຍຄົນ ກໍ່ຄົງຄິດວ່າ ຂ້ອຍເປັນຄົນມັກຕະຫຼົກເຮຮາ, ບໍ່ກ້າຮັບຄວາມຈິງ ແລະ ມັກເອົາໃຈຕົນເອງ. ຊີວິດຄອບຄົວ ກໍ່ເປັນອີກບັນຫາທີ່ຄິດວ່າ ຜູ່ຊາຍຄືໄທເຮົາເຈົ້າຂ້ອຍ ກະຄືຊິເປັນຄືກັນນັ້ນລະ. ເພາະວ່າທຸກຄົນລ້ວນແຕ່ມີຫົວໃຈອ່ອນ ບໍ່ແມ່ນຫົວໃຈຫີນ.
ຂ້ອຍກະມີເມຍທີ່ໜ້າຮັກ ແລະ ມີລູກແລ້ວຄົນໜື່ງ ຫາໄດ້ 6 ເດືອນ. ແຕ່ວ່າພົມລິຂິດ ກໍ່ກາຍມາເປັນບົດທົດສອບ. ຈົນມື້ນີ້ຂ້ອຍຕ້ອງໄດ້ມານັ່ງຄູ່ເຂົ່າ ຮັບສາລະພາບຕໍ່ໜ້າເມຍ ໃນຕອນຄ່ຳຄືນ ຂະນະທີ່ລູກກຳລັງນອນຫຼັບ.
ຍ້ອນບໍ່ຢາກໃຫ້ເປັນປົມດ້ອຍແກ່ລູກວ່າພໍ່ແມ່ຜິດຖຽງກັນ, ຂ້ອຍຈິ່ງອາໄສຊ່ວງເວລາ ເດີກດື່ນທ່ຽງຄືນເພື່ອ ບອກຄວາມໃນໃຈ ທີ່ຂ້ອຍເກັບໄວ້ມາເປັນເວລາສີ່ກວ່າປີ. ເປັນເວລາທີ່ຂ້ອຍຕ້ອງລັກໄປລັກມາ ຕ້ອງໄດ້ຕົວະ ເມຍໄປພຸ້ນມາພີ່. ໂດຍທີ່ເມຍບໍ່ຮູ້ເລີຍວ່າ ຂ້ອຍໄປສ້າງວິລະກຳໄວ້.
ເລື່ອງທີ່ຂ້ອຍໄດ້ສາລະພາບແກ່ເມຍໃນຄໍ່າຄືນນີ້ ແມ່ນຂ້ອຍໄດ້ແອັບໄປມີກິກ ສາວນັກຮຽນ. ເຊິ່ງເລື່ອງລາວເລີ່ມຕອນສີ່ປີກ່ອນ ໜ້າທີ່ ຕອນທີ່ຂ້ອຍ ໄປວຽກເຂດມະຫາໄລ ແລະ ໄດ້ພົບ ສາວຄົນນັ້ນ ໂດຍບັງເອີນ. ຈັກວ່າມັນເວນຫຼືກຳ! ຄວາມໜ້າຮັກ ບວກກັບສາຍຕາອັນຫວານ ແລະ ຮອຍຍິ້ມທີ່ບາດຕາບາດໃຈ ຈົນຂ້ອຍອົດບໍ່ໄຫວ.
ຂ້ອຍພົວພັນກັບສາວຄົນນັ້ນ ດ້ວຍຄວາມສະໜິດ ແລະ ເລິກເຊິ່ງ, ຂ້ອຍຍອມທີ່ຈະຕິດໜີ້ຕິດສິນ ເພື່ອຫາເງິນ ໄປຊ່ວຍການສຶກສາ ແລະ ການເປັນຢູ່ຂອງສາວຄົນນັ້ນ, ທັ່ງທີ່ຂ້ອຍກໍ່ມີພາລະ ທີ່ຕ້ອງເບິ່ງແຍງເມຍ ລູກ ແລະ ເຮືອນຊານ. ແຕ່ກະຊິເຮັດແນວໃດໄດ້ ແນວວ່າຫົວໃຈມັນຮຽກຮ້ອງ, ຫ້າມໃຈບໍ່ໄດ້ແທ້.
ຂະນະທີ່ຂ້ອຍ ສາລະພາບ ເລົ່າທຸກຢ່າງ ໃຫ້ເມຍຟັງ, ສີໜ້າເມຍຂ້ອຍຕອນນັ້ນ ເບິ່ງແລ້ວ ຂ້ອຍຄົງບໍ່ລອດແທ້ໆ. ເມຍຂ້ອຍທັງໜ້າແດງ ທັງກັດສົບໃສ່ຂ້ອຍຍໍ່າໆແຕ່ຂ້ອຍ ກໍ່ຂໍໃຫ້ລາວ ຟັງຂ້ອຍຈົນຈົບ ແລ້ວຂ້ອຍກໍ່ຈະຍອມໃຫ້ລາວ ລົງໂທດທຸກຢ່າງ.
ສິ່ງທີ່ໜັກໃຈຂ້ອຍຕອນນີ້ຄື ຂ້ອຍທຸ້ມເງິນມະຫາສານ ໃນການໄປເຊົ່າຫ້ອງພັກ ປີລະຫຼາຍສິບລ້ານ, ໂທລະສັບທັນສະໄໝ, ແລະ ຄ່າກິນຄ່າຢູ່ ອາທິດ ລະຫຼາຍລ້ານແກ່ສາວຄົນນັ້ນ. ຈົນດຽວນີ້ ຂ້ອຍມີໜີ້ ຫຼາຍຮ້ອຍລ້ານກີບ. ຖ້າບໍ່ຍອມຮັບສາລະພາບກັບເມຍ ຂ້ອຍກະບໍ່ຮູ້ຈະຫັ້ນໜ້າໄປເພິ່ງໃຜ. ເພາະຂ້ອຍເຊື່ອວ່າ ເມຍຕ້ອງເຂົ້າໃຈ ແລະ ໃຫ້ອະໄພຂ້ອຍແດ່.
ພຽງແຕ່ຂ້ອຍເລົ່າທຸກຢ່າງຈົບ! ເມຍຖາມຂ້ອຍວ່າ ເລົ່າຈົບແລ້ວບໍ່? ຈົບແລ້ວບໍ່? ຂ້ອຍກໍ່ຕອບວ່າຈົບແລ້ວ.
ທັນໃດນັ້ນ, ລາວກໍ່ຈັບເອົາເກີບແຕະ ມາຟາດໜ້າຂ້ອຍໝົດແຮງ! ພ້ອມກັບສຽງຮ້ອງຄັບບ້ານວ່າ!
ອ້າຍໆໆ!!! ລຸກໄປຕີນົມໃຫ້ລູກແດ່! ລູກເຮົາມັນຕື່ນນະ.....
ໂອ່ຍ!!!!ຮ່າມຶງເອີຍ ຂວັນມາຂວັນມາ...ກູ້ສັງມາຝັນຮ້າຍແທ້
No comments:
Post a Comment