ແຟນຈັບໄດ້ວ່າ ມີຊູ້....​ເກືອບຕາຍ

ເລື່ອງຈິງ ທີ່ຜູ່ຊາຍຄືຂ້ອຍ ຢາກຈະແຊເຕືອນ ບັນດາເພື່ອນຊາຍ ທັງຫຼາຍທີ່ມີແຟນ ຫຼື ມີເມຍ,​ ມີຄອບຄົວແລ້ວ.....

ບາງຄົນອາດຈະວ່າແມ່ນເລື່ອງ ໄຮ້ສາລະ ຕະຫຼົກເຮຮາ ກໍ່ໃຫ້ອົດສາອ່ານຈົນຈົບ.​ ເພາະເລື່ອງນີ້ ຂ້ອຍເອງກະຕັ້ງໃຈຈະມາເລົ່າ...

ມາເຂົ້າເລື່ອງກັນເລີຍເນາະ....

ຄືວ່າ ຂ້ອຍເອງ ຊາຍທີ່ໃສ່ເກີບແຕະ ໄປທະນາຄານ ມື້ນັ້ນຫັ້ນລະ... ຂ້ອຍກະມີແຟນທີ່ໜ້າຮັກ ງາມສົມຄວນພຸ້ນແລ້ວ ວ່າຊັ້ນຊາ. ແຕ່ຂ້ອຍກະເປັນຄົນປະເພດທີ່ ມັກຫຼຽວເບິ່ງຜູ່ສາວອື່ນ. ກະແບບທຳມະດາໄກ່ຜູ້ເຫັນ ໄກ່ແມ່ງາມໆ ກະຜັນເດືອຍ ໃສ່ຫັ້ນນາ.

ຄົບກັບແຟນມາໄດ້ 5 ປີ! ແລະ ກໍ່ໄດ້ຕົກລົງຈະສ້າງຄອບຄົວນຳກັນແທ້ໆ ເພາະຮູ້ໃຈກັນມາດົນ ແລະ ແຟນຂ້ອຍກະຮູ້ດີວ່າ ຂ້ອຍຂີ້ດື້ ແຕ່ບໍ່ເຄີຍນອກໃຈ ແລະ ຮັກລາວຄົນດຽວ. ວ່າຊັ້ນຊາ. ທີຈິງຂ້ອຍກະຮັກລາວອີຫຼີໄດ່. ຮັກສຸດຫົວໃຈ.

ແຕ່ແລ້ວ ກະເໝືອນວ່າ ພົມລິຂິດ! ສາມເດືອນຜ່ານມາ,​ ຂ້ອຍເອງໄດ້ມີໂອກາດ ໄປງານລ້ຽງເຮືອນສ່ຽວຮັກສ່ຽວແພງ ຢູ່ຕ່າງແຂວງ. ເພາະວ່າ ເປັນງານບຸນບ້ານສ່ຽວ ກະເລີຍຕ້ອງໄດ້ໄປ. ມື້ນັ້ນ, ແຟນກະບໍ່ໄດ້ໄປນຳ ກະເລີຍວ່າ ເປັນບ່າວໂສດ ວ່າຊ້ນແລ້ວ.

ພໍໄປຮອດງານ, ສ່ຽວກະເອົາເຕັມທີ ຈັດມາຫຼາຍຈອກເຕີບຈົນຫູດັບຕັບໄໝ້ ມ່ວນມັນ. ເຫຼົ້າເຂົ້າປາກ ມັນກະສຸດທໍ່ນັ້ນແລ້ວ.​ ຄວາມເປັນຊາຍເລີ່ມແຜງລິດ. ຂ້ອຍກະເລີ່ມເຕັ້ນເລີ່ມດິດ ໄປຕາມຈັ່ງຫວະຂອງບົດເພງ ໃນງານລ້ຽງ. 

ຈັ່ງແມ່ນຟ້າຜ່າກາງໃຈ!​ ທີ່ງານລ້ຽງ ຂ້ອຍໄດ້ພົບຍິງສາວ ໄວລຸ້ນ ທີ່ເປັນໝູ່ຂອງນ້ອງສາວສ່ຽວ. ປານວ່າສະດຸດຮັກ ກັບສາຍຕາຂອງນາງ. ຄວາມງາມສຳກັບຮູບຜູ່ສາວ ຂ້າງເທີງນັ້ນລະ.​ໃຜຊິອົດໃຈໄດ້ເນາະ ເພາະຂ້ອຍກະບໍ່ແມ່ນພຣະຫີນ, ກະເປັນຊາຍທຳມະດາ ທີ່ມີແຟນ ແຕ່ມາງານລ້ຽງຄົນດຽວຊື່ໆ. 

ຕອນທີ່ກຳລັງ ໃຈຫ້າວ ຢາກລົມສາວຄົນນັ້ນ, ອີກຄວາມຮູ້ສຶກໜື່ງ ກະນຶກເຫັນໜ້າແຟນ ທີ່ຄົບກັນມາຕັ້ງວ່າ 5 ປີ. ເພາະແຟນເຄີຍຕັດຄຳໄວ້ວ່າ ຖ້າມີຄົນອື່ນ ແລ້ວ ກະບໍ່ຕ້ອງມີລາວ. ຄິດຮອດຕອນນີ້ ແລະ ແມ່ນໃຈຖອຍປາບ ປາບ.... 

ບັງເອີນໄດ້ຍິນເພງຄວາມຮັກເປີດມາເບົາໆ .... ພັດເຮັດໃຫ້ອ້າຍບ່າວເກີບແຕະ ຄືຂ້ອຍໃຈຫວັ່ນຄອນ ຈົນໄດ້ຕັດສິນໃຈ ເຕັ້ນຢັບໄປເທື່ອລະໜ້ອຍເພື່ອໄປຫາຍິງຄົນໜ້າຮັກຄົນນັ້ນ.

ໃນທີ່ສຸດ ກະໄດ້ລົມໄດ້ຮູ້ຈັກ ໄດ້ຕຳຈອກ ກັນຫຼາຍຊົ່ວໂມງ,​ ສາວນັ້ນກໍ່ບໍ່ໄດ້ກິນເຫຼົ້າເບຍຫຼາຍ ລາວກະຈີບໆເອົາ. ສ່ວນຂ້ອຍນີ້ບໍ່ໃຫ້ເວົ້າ ກິນໄປຫຼາຍລິດແລ້ວອັນເບຍ. ຄວາມກ້າຫານ ຖືວ່າມາເຕັມຮ້ອຍ. 

ງານລ້ຽງ ດຳເນີນໄປຮອດເດີກຮອດດື່ນ,​ ຮູ້ສຶກວ່າເມົາຫຼາຍ.​ແຕ່ຍັງຈື່ດີວ່າ ໄດ້ມີໂອກາດນັ່ງລົມສອງຕໍ່ສອງກັບຍິງຄົນນັ້ນເປັນເວລາດົນ. ຈົນຮູ້ຊື່ສຽງຮຽງນາມ ແລະ ບ້ານເຮືອນ. ຄວາມເມົາ ບວກກັບຄວາມໜ້າຮັກ ແລະ ແສງສີໃນຄືນລາຕີ.​ ເຮັດໃຫ້ຂ້ອຍກັບຍິງຄົນນັ້ນຈົນໄດ້ລົງເອີຍໄປແບບເລິກເຊິ່ງ. ຂ້ອຍກະຂານອາສາໄປສົ່ງລາວຢູ່ເຮືອນ. 

ຍ້ອນສັນດານຂອງຜູ່ຊາຍກະບໍ່ຈັກ, ຂ້ອຍພັດສົ່ງລາວບໍ່ຮອດເຮືອນ. ພໍຕື່ນເຊົ້າມາ ພັດວ່າແມ່ນຢູ່ບ້ານພັກ. ນອນເປືອຍຄີງກັບຍິງທີ່ແສນໜ້າຮັກຄົນນັ້ນ. ຕອນນີ້ ຮູ້ສຶກວ່າມີຫຍັງມາຕົບຫົວດັງປັບໆໆ. ຮີບຟ້າວໄປຈັບເບິ່ງໂທລະສັບ. ຕາຍຮ່າ! ສາຍບໍ່ໄດ້ຮັບ 120 ສາຍ ເຊິ່ງແມ່ນເບີຂອງແຟນຂ້ອຍນັ້ນເອງ.

ຄັນຊິໂທກັບ ກະຢ້ານສາວທີ່ນອນຂ້າງໆຮູ້,​ ຄັນບໍໂທ ແຟນກະຊິຮ້າຍ. ຈິງຕັດສິນໃຈມອດໂທລະສັບ ແລະ ຟ້າວພາສາວນ້ອຍຄົນນັ້ນໄປ ສົ່ງບ້ານ.

ເວລາຜ່ານມາ ຈົນສາມເດືອນມື້ນີ້! ຄິດວ່າຈະບໍມີຫຍັງ!​ ຈົນຂ້ອຍໄດ້ຮັບຂໍ້ຄວາມຈາກຍິງຄົນນັ້ນວ່າ ມີລູກໄດ້ 3 ເດືອນ. ພໍອ່ານຂໍ້ຄວາມນີ້ ຂ້ອຍຮີບຟ້າວໂທຫາລາວ.​ ຈົນເຮັດໃຫ້ຂ້ອຍຕ້ອງຂາລ່ອຍ ເພາະມັນແມ່ນຄວາມຈິງ. ຂ້ອຍເຮັດໃຫ້ລາວທ້ອງ. ຂ້ອຍກວດເບິ່ງ ຮູບໃບເອໂກທ້ອງ ທີ່ລາວສົ່ງມາ. 

ມາຮອດຕອນນີ້,  ຂ້ອຍບໍ່ຮູ້ຊິເວົ້າ ແລະ ເປີດເຜີຍຄວາມຈິງນີ້ກັບແຟນທີ່ຄົບກັນມາ 5 ປີແນວໃດ.  ເພາະຖ້າຂ້ອຍບອກລາວ ຕ້ອງເກີດສົງຄາມແນ່ນອນ. ຂ້ອຍຕ້ອງຕາຍແທ້ໆ.

ແຕ່ຍ້ອນເຄີຍຕົກລົງກັນແລ້ວວ່າ ຖ້າມີບັນຫາໃດ ຕ້ອງເວົ້າເປີດອົກ. ຂ້ອຍຈິງຕັດສິນໃຈບອກຄວາມຈິງກັບລາວ.....

ພໍແຕ່ລາວຮູ້ເລື່ອງ! ຟ້າເອີຍ....  

ແມ່ນໃຜວະ ມາເປີດ ຜ້າກັ້ງປ່ອງຢ້ຽມແດດຊ່ອງໃສ່ໜ້າ ຕື່ນທັງຫຼັບທັງຝັນ.....😁😁😁 

ທີແທ້ລະແມ່ນແມ່ຂ້ອຍມາປຸກໃຫ້ໄປຖອນເງິນຢູ່ທະນາຄານ

ໂອຍ! ເນາະຂ້ອຍລະຝັນຮ້າຍເອົາແທ້ເອົາວ່າ